လူတွေဆီကနေ အထာကျကျ ထွက်ခွါပါ ။
ဘာကို ဆိုလိုသလဲဆိုရင်
လူတွေ ကိုယ့်အပေါ်ထားတဲ့ မေတ္တာ စေတနာ
အတိုင်းတာကို စောကဒတက်ပြီး
ငါ့ကို ဘယ်လိုဆက်ဆံလို့
ဘယ်လို လုပ်ရက်လို့ …
ငါက ဒီလို ခံစားရတာပါ
ငါက ဘယ်လို ပြောဆို ပြုမူစေချင်တာပါဆိုပြီး
စိတ်အလိုမကျမှုတွေကို ဝမ်းနည်းစိတ် ၊ ဒေါသစိတ်တွေနဲ့ သိလာဖို့ ပြောဆိုမနေပဲ ၊ ကိုယ့်စိတ် ၊ ကိုယ့်အသိနဲ့သာ လုံလောက်ဖို့ ဖြစ်တယ် ။
ဘယ်စကားပြောရင် ဘယ်လို နာကျင်မယ်ဆိုတာ သိပါတယ် ။ ဘယ်လုပ်ရပ်ကတော့ ဘယ်သူ့ကို ထိခိုက်မယ်ဆိုတာ နားလည်ပါတယ် ။ ဘယ်စကားမျိုး ၊ ဘယ်အပြုမူမျိုးနဲ့ ပြန်ဖာထေးရင် အဆင်ပြေမလဲ သိပါတယ် ။ လူတိုင်း သိတဲ့အရာတွေကို … မေ့နေမလား ၊ မသိသလားအထင်နဲ့ သတိပေးစရာမလိုပါဘူး ။
အိပ်ချင်ယောင်ဆောင်သူကို နိုးဖို့ ကြိုးစားတဲ့အခါ … ကိုယ်ကပဲ toxic လို ၊ အကဲပိုနေသလို ပုံစံနဲ့ gaslight သာ ပြန်လုပ်လိမ့်မယ် ။
အဲဒီအခါမျိုးတွေမှာ …
ကိုယ်မို့လို့ မေတ္တာမထားတာ ။
ကိုယ့်အပေါ် စေတနာ မရှိတာလို့ပဲ မှတ်ယူပြီး ကိုယ့်ကိုယ်ကို အနေထိုင်တတ်ဖို့ ကြိုးစားရမှာပါ ။
သူ့စိတ်ကို သွားထိန်းချုပ်ချင်မိတဲ့
ကိုယ်တိုင်ကိုသာ ပြန်ဆုံးမရမှာပါ ။
စေတနာ ၊ မေတ္တာကြောင့်ပဲ ချစ်ခင်ကြတာ ၊ ကာကွယ်တာ ၊ လုံခြုံစေတာ ..
ဒီအရာတွေ ကိုယ့်အပေါ်မရှိတဲ့သူက ဆန့်ကျင့်ဘက်တွေ လုပ်နေမှာပဲ ။
ဒီလိုလူဆီက ဘယ်အရာကိုမှ ကြီးကြီးမားမား မျှော်လင့်လို့ မရနိုင်ဘူး ။
ဒါကို သိနားလည်ပြီး ..
ဆင်ခြေတွေ ဖြေရှင်းချက်တွေ ကြားရဖို့
ရန်ဖြစ် စကားများ စိတ်ပင်ပန်းခံပြီး ပြဿနာ မရှာပါနဲ့ ။ စကားတွေထက် လုပ်ရပ်တွေကိုသာ ကြည့်ပြီး … သူ့အတွက်အကျိုးမရှိ … ကိုယ့်အတွက်လည်း ပူလောင်စေမဲ့ နာလုံးပေါက်စရာစကားတွေကို မြိုသိပ်ပြီး … ကိုယ်တိုင်သာ တဖြည်းဖြည်း ကွယ်ပျောက်တတ်ဖို့ ကြိုးစားပါ ။
အဲလိုလူတွေက အထာကျဆုံးပဲ ။
ထစ်ခနဲရှိ စကားများရန်ဖြစ်ပြီး … ဖြေရှင်းစရာမလိုအပ်ဘူး ။ လုပ်ရပ်တွေက ပြောပြထားပြီးသားပဲ ။
ကိုယ့်နှလုံးသား နှင့် ဦးနှောက်ကိုသာ သဘောတူနိုင်ဖို့
သတိကပ်ရင်း … စိတ်ဒဏ်ရာပေးတဲ့ အရပ်ဒေသ ၊ ပတ်ဝန်းကျင် ၊ လူတွေဆီကနေ တိတ်တဆိတ် ထွက်ခဲ့ပါ ။
ဒီအရာဟာ သိက္ခာအရှိဆုံး နှင့် အကောင်းဆုံး လက်တုန့်ပြန်နည်းသာ ဖြစ်တယ် ။ တိတ်ဆိတ်တဲ့ ထွက်ခွါခြင်းဟာ … တစ်ဖက်လူရဲ့ မာန နှင့် အတ္တကို ကျိုးကြေစေတယ် ။
No comments:
Post a Comment