မင်းသိလား ညီလေး
လူ့အန္ဓတွေမှာ ရိုးသားတယ်ဆိုတာမရှိဘူး
မဖြစ်မနေရိုးသားဖို့
အကျပ်ကိုင်ခံထားရတဲ့ အခြေအနေအောက်မှာ
မူးတူးမင်တင် မိန်းမောနေမျိုးတာပဲရှိတယ်
လူ့အန္ဓတွေမှာ ရဲရင့်တယ်ဆိုတာမရှိဘူး
ယမ်းနံ့ကိုရှုရင်း
တရှုးထိုးတိုးဝင်သွားတဲ့ တောဝက်တစ်ကောင်ရဲ့
မိုက်မဲမှုမျိုးပဲရှိတယ်
လူ့အန္ဓတွေမှာ ညီညွတ်တယ်ဆိုတာလည်းမရှိဘူး
သိုးတစ်အုပ်လို
တစ်ကောင်သွားရာနောက် တစ်ကောင်
အသိမဲ့လိုက်ပါလှုပ်ရှားတာမျိုးပဲရှိတယ်
လူ့အန္ဓတွေမှာ တက်ကြွတယ်ဆိုတာလည်းမရှိဘူး
အရေးဟဲ့ဆို ဖျတ်ကနဲ လန့်နိုးလာပြီး
ခဏအကြာ ပြန်အိပ်ပျော်သွားတဲ့
ကြက်တစ်ကောင်ရဲ့ နိုးကြားမှုမျိုးပဲရှိတယ်
လူ့အန္ဓတွေမှာ သစ္စာတရားဆိုတာမရှိဘူး
တစ်ယောက်ယောက်အပေါ် သစ္စာရှိတာပဲဖြစ်ဖြစ်
အမှန်ဓမ္မအပေါ် သစ္စာဖောက်ဖျက်ရတာပဲဖြစ်ဖြစ်
ဘာမှမထူးခြားတဲ့ စိတ်ခံစားမှုမျိုးပဲရှိတယ်
လူ့အန္ဓတွေမှာ
ရိုသေလေးမြတ်တယ်ဆိုတာမရှိဘူး
အတွေးအခေါ် ကျွန်ခံလိုက်တာမျိုးပဲရှိတယ်
လူ့အန္ဓတွေမှာ
ရောင့်ရဲရိုးရှင်းတယ်ဆိုတာမရှိဘူး
ဖောက်ထွက် မတွေးတတ်တာပဲရှိတယ်
မင်းသိလား ညီလေး
လူ့အန္ဓတွေမှာ
မကောင်းမှုကျူးလွန်လိုက်တယ်ဆိုတာမျိုးတောင်
တခါတရံမရှိဘူး
သူ့မွေးရာပါ
အဟိတ်တိရိစ္ဆာန်စိတ်က ဦးဆောင်ရာနောက်
အသိမဲ့လိုက်ပါသွားတာမျိုးပဲရှိတယ်။
#ကိုသန်းထွန်း (တွေးမလား သေမလား)
#ဗလကသ
No comments:
Post a Comment