မျှော်လင့်ချက်

 'နွေနှောင်းလွန်စ မိုးဝသန်ဝယ်

တိမ်ညစ်ညိုတို့ ကောင်းကင်မှာကွယ်
ရွာမလိုနဲ့ မည်းတယ် မှောင်ရီခြယ်'

သီချင်းတွေက အတိတ်ကို ခေါ်သွားနိုင်တယ်။ မူယာမာယာမိုးက အဖေ ဖွင့်နေကြ သီချင်းလေး။ ဇော်ဝင်းထွဋ်က အဖေ အကြိုက်ဆုံး အဆိုတော်။ အဖေ ဖွင့်ခဲ့သမျှ သီချင်းတွေဟာ ကျနော် နားထဲစွဲလို့။ တနေရာရာမှာ ပြန်ကြားရင်ဖြင့် အတိတ်ဆီ ရောက်ရောက်သွားတတ်တယ်။

ပတ်ဝန်းကျင် အမြင်မှာတော့ ကျနော်တို့ မိသားစုက ပူလောင်တယ်တဲ့။ အဖေနဲ့ အမေကြားက ဖြေရှင်းမရတဲ့ လူမှု့ရေး ပြသနာတွေကြောင့် ညတိုင်းလိုလို ရန်ပွဲတွေ ရှိခဲ့တယ်။ ကျနော်တို့ သားသမီးတွေကလဲ မလိမ္မာပါဘူး။ မောင်နှမချင်း မတည့်ဘူး။ မိဘစကား နားမထောင်ခဲ့ဘူး။ သို့သော် အဖေနဲ့ အမေရဲ့ သားသမီးအပေါ် ဆိုဆုံးမပုံကလဲ ပုံမှန် မဟုတ်ခဲ့ဘူး။ အပြစ်ကြီးကြီး လုပ်ထားပေမယ့် ချစ်ပြနေတတ်သလို ဘာမှမဟုတ်တဲ့ ကိစ္စလေးနဲ့လဲ အသေအလဲ ထရိုက်တတ်တာမျိုး။ သူတို့ရဲ့ လက်ရှိ စိတ်ခံစားချက်အပေါ် မူတည်ပြီး ဆက်ဆံခံရတယ်။

နောက်ပိုင်း အဖေ အရက်လုံးလုံး စွဲလာတဲ့အခါ ဘာအလုပ်မှ မလုပ်တော့သလို ယောင်္ကျားမာနလဲ အဆုံးထိ လျှော့ချလိုက်တယ်။ ညသန်းခေါင်ကြီး ပြန်လာ တရပ်ကွက်လုံးကြားအောင် ကားဟွန်းတွေတီး အမေ့ကို တံခါးလာဖွင့်ခိုင်းတဲ့ အဖေ မဟုတ်တော့ဘူး။ အင်္ကျီနဲနဲလေး ကြေနေရင်တောင် ပြသနာရှာတဲ့ အဖေ မဟုတ်တော့ဘူး။ အရင်လို အိမ်ထဲ ဂေါက်တံကြီး တကားကား မီးချောင်းတွေ ကွဲအောင် ရိုက်မနေတော့ဘူး။

အဖေဟာ အရက်နဲ့ အရာအားလုံးကို လဲလိုက်တယ်။ အမေက အိမ်ထောင်တာဝန် အားလုံး ယူလိုက်တယ်။ ငွေရှာတာကအစ ကလေး ဝေယျဝစ္စ၊ ချက်တာပြုတ်တာအဆုံး တယောက်ထဲ ဒိုင်ခံဖြေရှင်းခဲ့တယ်။ အမေ့ရဲ့ ပင်ပန်းမှု့၊ စိတ်အလိုမကျမှု့၊ ဒေါသတွေ ပိုများတယ်။ အရင် လင်မယားချင်း ရန်ဖြစ်ရင် လက်ပါတတ်တဲ့ အဖေဟာ အမေ ဘာပြောပြော ငြိမ်ခံရတဲ့ ဘဝရောက်သွားတယ်။

ပူလောင်မှု့တွေ၊ စိတ်ညစ်ညူးစရာတွေကြားက ပျော်စရာတွေ၊ ကြည်နူးစရာ အခိုက်အတန့်တွေလဲ ရှိခဲ့တယ်။ အရင်ကတော့ အဖေနဲ့ အမေ သင့်သင့်မြတ်မြတ် ရှိမယ်။ ကိုယ့်တာဝန် ကိုယ်ကျေတဲ့ ပျော်ရွှင်စရာ မိသားစုလေး မျှော်လင့်ခဲ့ဖူးတယ်။ ပတ်ဝန်းကျင်က တည်ငြိမ်အေးချမ်းတဲ့ မိသားစုတွေတွေ့ရင် လိုချင်ခဲ့ဖူးတယ်။

အခုနောက်ပိုင်း မဖြစ်နိုင်တာတွေ၊ မတူညီနိုင်တာတွေကို မျှော်လင့်နေတာထက် ကိုယ့်အခြေအနေအပေါ်မှာ လက်ခံနေနိုင်အောင်ပဲ ကြိုးစားဖြစ်လာတယ်။ ကိုယ့်မိဘ၊ ကိုယ့်မိသားစု၊ ကိုယ့်လူမျိုး၊ ကိုယ့်တိုင်းပြည်ဟာ သူများမိဘ၊ သူများမိသားစု၊ သူများလူမျိုး၊ သူများတိုင်းပြည်တွေနဲ့ မတူနိုင်ဘူး။ ကိုယ်ဖြစ်ချင်သလို မဖြစ်နိုင်တာတွေဟာ အရွယ်ရလာတာနဲ့အမျှ ပိုပိုများလာကြောင်း သဘောပေါက်လာတယ်။ လူငယ်တုန်းကတော့ ကြိုးစားရင် ဘုရားတောင် ဖြစ်နိုင်တယ်ပေါ့။ အရွယ်ရလာတော့ ကိုယ့်ကလေး ကိုယ့်စကား နားထောင်ဖို့တောင် မျှော်လင့်ချက် မထားရဲတော့ဘူး။

သီချင်းတွေဟာ အတိတ်အကြောင်းတွေကို ပြောပြတယ်။ မူယာမာယာမိုး နားထောင်ရင်း တချိန်က ပူလောင်တဲ့ မိသားစုဘဝလေးဆီ သတိရမိသွားတယ်။ အခုချိန် အဖေနဲ့ အမေသာ ရှိဦးမယ်ဆို သား ဖြစ်ချင်တာ ဘာလဲ မပြောတော့ဘူး။ ဒီအတိုင်းလေးပဲ အဖေနဲ့အတူ သီချင်း နားထောင်မယ်။ အမေ့ ရင်ခွင်ထဲမှာနေမယ်။