​ကြိုးစား ​လေ့ကျင့်သင့်တဲ့ စကား​ပြော စွမ်းရည်

 ဆယ်​ကျော်သက် သမီး​လေးကို သင်​ပေးဖြစ်​သော......

သမီး​လေးက ငယ်ငယ်တုန်းက အိမ်မှာ စကားများ​ပေမဲ့ ​ကျောင်းမှာ စကားနည်းပါတယ်။
အခုကြီးလာ​တော့ အိမ်မှာ​ရော ​ကျောင်းမှာပါ စကား​တွေပို ​ပြောလာပါတယ်။ အထူးသဖြင့် ​ကျောင်းမှာဆို စကားများတဲ့က​လေး​တွေထဲမှာ ပါပါတယ်။
​တော်​တော် ခင်တဲ့ သူငယ်ချင်း​တွေနဲ့ဆို ​ပြောစရာ​တွေက မကုန်နိုင်​အောင်ပါပဲ။
သက်တူ ရွယ်တူ အမြင်​တွေတူ​တော့ အချင်းချင်း စကား​ပြောရတာ သူတို့အတွက် ​ပျော်စရာ၊ အပန်း​​ဖြေစရာ တစ်ခုလိုပါပဲ။

​မေ​မေကိုယ်တိုင်ကလည်း စကားများတဲ့သူဆို​တော့ အခုလို သူငယ်ချင်း​တွေနဲ့ စကားတ​ပြော​ပြော သွက်သွက်လက်လက်​လေး ဖြစ်လာတာ သ​ဘောကျပါတယ်။ အားလည်း ​ပေးပါတယ်။

ဒါ​ပေမဲ့ မကြာခင် လူကြီးဖြစ်လာ​တော့မှာ ဆို​တော့ အများနဲ့ ဆက်ဆံတဲ့အခါ စကားမှားနိုင်တဲ့ အ​ခြေအ​နေ​လေး​တွေ၊ တိတ်တိတ်​နေသင့်တဲ့ အ​ခြေအ​နေ​လေး​တွေကိုလည်း အခုထဲက တဖြည်းဖြည်း သင်​ပေးဖြစ်ပါတယ်။

ဘယ်အချိန်မှာ တိတ်တိတ်​နေသင့်တယ် ဆိုတာ သိဖို့၊ ကိုယ့်ပါးစပ်ကိုယ် ထိန်းနိုင်ဖို့၊ pause button ​လေးကို အချိန်မီ နှိပ်နိုင်ဖို့ ဆိုတာ အ​လေ့အကျင့်​တွေ လိုပါတယ်။

■ အ​ကြောင်းအရာ တစ်ခုကို ​သေ​သေချာချာ မသိဘဲ ထင်မြင်ချက်​တွေ ဝင်မ​ပေးမိဖို့

■ကိုယ်မကျွမ်းကျင်တဲ့ field ​တွေကို ဝင်မ​ဆွေး​နွေးမိဖို့

■အကျိုးမရှိ အသုံးမဝင် ဘယ်သူမှ တန်ဖိုးမထားတဲ့ အကြံဥာဏ်မျိုး​တွေနဲ့ ဆရာဝင် မ​လုပ်မိဖို့

​■ကောင်းတဲ့ ခံစားချက်ပဲ ဖြစ်ဖြစ်၊ ဆိုးတဲ့ ခံစားချက်ပဲဖြစ်ဖြစ် စိတ်ခံစားမှု​တွေ ပြင်းထန်​နေတဲ့ အချိန်မျိုး ( ဝမ်းနည်း​နေတဲ့အခါ၊ စိတ်တို​နေတဲ့ အခါ၊ စိတ်လှုပ်ရှား​နေတဲ့ အခါ၊ အ​ပျော်လွန်​နေတဲ့ အခါ) မှာ စကား​တွေ အများကြီး မ​ပြောမိဖို့

■ တခြားတစ်​ယောက်​ယောက် စိတ်တို ​ပေါက်ကွဲ​နေတဲ့ အချိန်မှာ တစ်ခုခု ဝင်မ​ပြောမိဖို့

■သူငယ်ချင်းက ဝမ်းနည်း​နေတဲ့အခါ၊ ရှက်ရွံ့​နေတဲ့အခါ၊ ကိုယ်​ရေးကိုယ်တာ ပြသနာ တစ်ခုခု ရှိ​နေတဲ့အခါ စာနာစိတ်​လေးနဲ့ အလိုက်တသိ တိတ်တိတ်​လေး ​နေ​ပေးဖို့

■အမုန်းစကား​တွေ၊ အတင်းအဖျင်း​တွေကြားမှာ ဝင်မရှုပ်မိဖို့

■သူတပါး ထိခိုက်နာကျင်​စေမယ့် စကားမျိုးကို စိတ်လိုက်မာန်ပါ မ​ပြောမိဖို့

■တစ်​ယောက်​ယောက်က ရင်ဖွင့်​နေတဲ့ အချိန်မှာ ကြားဖြတ်မ​ပြောဖို့

■သူတစ်ပါးရဲ့ လျှို့ဝှက်ချက်ကို ​စောင့်ထိန်း​ပေးဖို့

■အပြုသ​ဘော မ​ဆောင်တဲ့ အဆိုးမြင်သက်သက် ​ဝေဖန်တိုက်ခိုက်မှု​တွေကို ခွန်းတုံ့မပြန်ဖို့.....

စသဖြင့် သမီးကို သတိ​ပေးဖြစ်ပါတယ်။

တချို့ အ​ခြေအ​နေ​တွေမှာဆို တိတ်တိတ်​နေခြင်းက အ​ကောင်းဆုံး ပြသနာ ​ဖြေရှင်း​နည်းတောင် ဖြစ်​နေတတ်ပါတယ်။

စကား​ပြောတယ်ဆိုတာ ကခုန်သလိုပဲ ဆိုတဲ့ ဥပမာ​လေး ကြားဖူးပါတယ်။ ဘယ်အချိန် ​ရှေ့တိုးရမယ်၊ ဘယ်အချိန် ​နောက်ဆုတ်ရမယ်၊ ဘယ်အချိန် ရပ်​နေရမယ် ဆိုတဲ့ စည်းချက်​တွေကို ကျွမ်းကျင် ပိုင်နိုင်​​နေတာလည်း ​ကြိုးစား ​လေ့ကျင့်သင့်တဲ့ စကား​ပြော စွမ်းရည် တစ်ခုပါပဲ။

Dr.May Mon
14th Nov 2024