မြန်မာဟင်းစစ်စစ်ဆီပြန်ချက်လေးတခုနဲ့မိတ်ဆက်ပေးပါဦးမယ်။
ဆီပြန်ဟင်းလို့ခေါ်ပေမယ့်အနှစ်တွေအီဆိမ့်၊ဆီတွေဝေ့တက်နေတာမျိုးမဟုတ်ပဲ ဆီနဲ့အနှစ်ကိုကွဲထွက်သွားအောင်ချက်ထားတာမို့ စားတဲ့အချိန်မှာအသားတုံးကိုဆယ်ယူပြီးထမင်းနဲ့နယ်လိုက်တာနဲ့အနှစ်အရသာပြန်ရအောင် အနှစ်ကပ်စေတဲ့နည်းနဲ့ချက်ထားခြင်းမျိုးဖြစ်ပါတယ်။
တခါမှမချက်ဖူးသူတွေတောင်ဒီတိုင်းလေးချက်ကြည့်မယ်ဆိုရင်အဆင်ပြေစေမှာပါ။
ချက်နည်းလေးကတော့အင်မတန်လွယ်ပါတယ်။
ဗမာကြက် ၄၀ သားလောက်ဆိုရင် ၄ ပိုင်းသာပိုင်းပါ(ဒံပေါက်ထဲကကြက်သားပုံစံမျိုး) ကျွန်တော်သုံးတဲ့ကြက်က အနည်းငယ်ကြီးတာနဲ့ ဒယ်အိုးမဆံ့တာ
ကြောင့် ပေါင် ၂ ခြမ်းကို ၄ ပိုင်းပြန်ပိုင်းထားပါတယ်။
သန့်စင်ရေဆေးပြီးတဲ့ကြက်ကို ရေစင်အောင်စစ်ပြီးဆား၊အရသာမှုန့်၊နနွင်းအနည်းငယ်နှင့်ချင်းထောင်းအရည်လေးညှစ်ချပြိီးနယ်ကာအရသာနှပ်ထားပါ။
ကျွန်တော်သုံးတဲ့ကြက်က ၇၀ သားအရွယ်မို့အနည်းငယ်ရင့်မာမယ်ထင်တာကြောင့်ဟင်းချက်ဝိုင်လေးအနည်းငယ်ထည့်နယ်ထားပါတယ်။
ကြက်သားက ၃၀ သားလောက်ဖြစ်တာမို့ကြက်သွန်နီ ဥကြီးကြီး ၃ လုံးကို နုပ်နုပ်စဥ်းပြီးဆီသပ်ပါ။ ကြက်သွန်နီက ကြွပ်ပြီးရွှေဝါရောင်သမ်းလာပြီဆို အရောင်တင်မှုန့်လေးပါသည်ဆိုရုံထည့်ပါ။ ပြီးမှအရသာနယ်ထားတဲ့ကြက်သားတွေထည့်လုံးပါ။
ရေကိုအစောတလျင်မထည့်မိပါစေနဲ့။ မိမိသုံးတဲ့ကြက်သားက ရေစစ်ချိန်မှာရေမစင်တာမျိုး၊ တအားနုတဲ့ကြက်ဆိုပြဲအိသွားနိုင်ပါတယ်။ ကြက်သားထဲကအရည်စိမ့်ထွက်တာနဲ့လုံးမယ်ဆိုရင် ချက်ချင်းအသားတွေတင်းခဲလာပြီးကြွပ်နေတဲ့ကြက်သွန်နီကလဲခဏနဲ့အနှစ်ကျပါလိမ့်မယ်။
မီးအေးအေးနဲ့လုံးချက်ပြီး ဆူးခက်ရင်းလေးနဲ့ထိုးကြည့်လို့အနည်းငယ်မာနေမှသာရေလေးအနည်းငယ်ဖြည့်စွက်ပေးပါ။ ကျွန်တော်သုံးတဲ့ကြက်သားကအနည်းငယ်မာတာမို့ရေအနည်းငယ်စွက်ရပါတယ်။ နုရင်တော့ရေလုံးဝလိုက်စရာမလိုပါ။ ဆီနဲ့အငွေ့ရှိန်ကြောင့်နူးအိပါလိမ့်မယ်။
အနှစ်နဲ့ဆီတိကျသေချာစွာကွဲထွက်ပြီး ကြက်သားလဲနူးပြီဆိုဖိုခွင်ပေါ်မှချလို့ရပါပြီ။
ပုံထဲကအနေအထားအတိုင်းဖြစ်ပါတယ်။
ဒီချက်နည်းဟာ တခြားဟင်းခတ်အမွှေးအကြိုင်တွေမသုံးထားတာကြောင့် ကြက်သားရဲ့ပင်ကိုယ်ရနံ့မွှေးမွှေးကိုခံစားရရှိစေမှာပါ။ အချိုအတွက်လဲကြက်သွန်နီတမျိုးတည်းကိုသာအဓိကသုံးထားတာမို့ ကြက်သားရဲ့မွှေးရနံ့ကိုအပြည့်အဝထောက်ပံ့ပေးထားပါတယ်။
ဘယ်လိုလေးစားရင်အလိုက်ဖက်ဆုံးလဲဆိုတာလေးလဲဖော်ပြပါ့မယ်။ ကြက်သား ၁ တုံးကို ထမင်းလေးနဲ့နယ်လိုက်ပါ။ မိမိစားလိုတဲ့ ငပိရည်၊ငံပြာရည်ချက်၊ ငပိကြော်လေးနဲ့နယ်စားပါ။
ကျွန်တော်ကငပိရည်အလွတ်ကိုဆမ်း၊ ငရုတ်လှော်မှုန့်လေးဖြူး၊ ချဥ်ပေါင်ကြော်လေးနည်းနည်းထည့်နယ်ပြီးစားမှာဖြစ်ပါကြောင်း။
စိတ်ချမ်းသာ ၊ကိုယ်ကျန်းမာရှိကြပါစေဗျား။
ချစ်ခြင်းများစွာဖြင့်..။
ဝင်းနိုင်သိန်း
၃၀ ၊ အောက်တိုဘာ ၊ ၂၀၂၅။
No comments:
Post a Comment