သီးနှံများအား မြေမချဘဲ အိတ်ဖြင့်ထည့်၍ စိုက်ပျိုးခြင်း-ဒေါက်တာဝဏ္ဏထွန်း

 သီးနှံများအား မြေမချဘဲ အိတ်ဖြင့်ထည့်၍ စိုက်ပျိုးခြင်း

ဒေါက်တာဝဏ္ဏထွန်း

----------------------------------

ဒီလောက်စိုက်ပျိုးမြေတွေရှိနေပါလျှက် သီးနှံတွေကို အိတ်နဲ့စိုက်ပျိုးထားတာမြင်တော့ ကျွန်တော်ဖြင့် အံ့ဩမိခဲ့ပါတယ်။

မြေဆီလွှာဂေဟဗေဒရှုထောင့်ကနေကြည့်မိရင်လည်း သက်ရှိတွေနဲ့ အသက်ဝင်၊ သံသရာလည်ပတ်နေတဲ့ မြေဆီလွှာထဲမှာပဲ အပင်တွေကို စိုက်ပျိုးစေချင်မိပါတယ်။

ဒါပေမယ့် စိုက်ပျိုးတဲ့သီးနှံတွေ၊ အသုံးပြုတဲ့ ဓာတ်မြေဩဇာနဲ့ ဓာတုဆေးတွေကြောင့် သူ့ကိုလက်ခံထားရတဲ့ ပထဝီမြေကြီးဟာ ဒဏ်ရာတွေရ၊ ပျက်စီးရရှာတာကို ကျွန်တော်တို့ မေ့ထားလို့မရပါဘူး။

o မြေဆီလွှာထဲမှာ အာဟာရတွေကုန်ခမ်းသွားတယ်။

o မြေတည်ဆောက်ပုံ ပျက်စီးကုန်တယ်။

o ရေတွေမထိန်းနိုင်တော့ဘူး။

o မြေဆောင်ရောဂါပိုးနဲ့ ဖျက်ပိုးတွေနဲ့ မြေကြီးထဲ ပြည့်နေတယ်။

o သီးနှံတွေ မကြီးထွားနိုင်တော့ဘူး၊ မကျန်းမာတော့ဘူး၊ အထွက်နှုန်းမကောင်းတော့ဘူး။

Greenhouse ထဲမှာ သီးနှံတွေစိုက်ပျိုးရင်လည်း အချိန်ကြာလာသည်နှင့်အမျှ ဓာတ်မြေဩဇာ၊ အော်ဂဲနစ်မြေဩဇာ၊ အသုံးပြုသည့်ရေ၊ CO2 များရေတွင်ပျော်ဝင်လာမှု စသည့်အကြောင်းရင်းများကြောင့် မြေဆီလွှာချဥ်ခြင်း၊ ငန်ခြင်း၊ မြေပျက်စီးခြင်းများ ဖြစ်လာတတ်ပါတယ်။

ဒါကြောင့်မို့ စိုက်ခင်းကြီးတစ်ခုလုံးက မြေဆီလွှာကို အချိန်ကြာမြင့်စွာ ပြန်လည်ကုစားမယ့်အစား၊ စိုက်ပျိုးမြေကိုလိုအပ်သလိုပြင်ဆင်၊ လိုအပ်သလို အာဟာရထည့်သွင်း၊ လိုအပ်သလို ရေပေး၍ သီးနှံတွေကို အိတ်ထဲထည့်စိုက်ပျိုးလာကြပါတယ်။ မြေနေရာရှားပါးတဲ့နေရာတွေ၊ မြို့ပြအဆောက်အဦးတွေနဲ့ ခေါင်မိုးတွေပေါ်မှာ သီးနှံတွေကို အိတ်နဲ့ထည့် စိုက်ပျိုးလာကြပါတယ်။

အခုဆိုရင် သီးနှံအလိုက် အပြည့်အစုံတွက်ချက်ထားတဲ့ မြေဩဇာတွေအပါအဝင် အသင့်သုံးအိတ်တွေကို စီးပွားဖြစ်ရောင်းချ၍၊ စီးပွားဖြစ်စိုက်ပျိုးနေကြပါပြီ။ အိတ်ကိုထိပ်ဖွင့်၊ ရေဆင်၍ အပင်တန်းစိုက်ရုံပါပဲ။

အိတ်ဖြင့်စိုက်ပျိုးခြင်းရဲ့ အခြားကောင်းကျိုးတွေကတော့-

• နေရာမယူခြင်း၊ နေရာမရွေးခြင်း၊ အိမ်ဝရန်တာ၊ လသာဆောင်၊ မီးဖိုချောင်များ၌ စိုက်ပျိုးနိုင်ခြင်း

• Greenhouse ထဲ၌ ရာသီမရွေးစိုက်ပျိုးနိုင်ခြင်း

• မြေပျက်စီးသည့်နေရာများ၌ စိုက်ပျိုးနိုင်ခြင်း

• အိတ်များကို ရွှေ့ပြောင်းနိုင်သောကြောင့် ပင်ကြားတန်းကြားကို လိုသလိုပြင်ဆင်နိုင်ခြင်း၊

• အပင်များနေရောင်ခြည်ရရှိရန် လိုအပ်သလို ရွှေ့နိုင်ခြင်း

• ဆိုးရွားသည့်ရာသီဥတု၌ အပင်များကို ရွှေ့ပြောင်းနိုင်ခြင်း

• အပင်များ၌ ရေမဝပ်ခြင်း

• မြေဆောင်ရောဂါဖြစ်ပွားမှုကို လျှော့ချနိုင်ခြင်း

• အာဟာရလေလွင့်ဆုံးရှုံးမှုနည်းခြင်း

• စိုက်ပျိုးရေကို ခြွေတာနိုင်ခြင်း

• မြေထွန်ယက်စရာမလိုအပ်ခြင်း

• ပေါင်းနှိမ်နင်းရသက်သာခြင်း

• အပင်အသေအပျောက်ရှိပါက အလွယ်တကူ အစားထိုးလဲလှယ်နိုင်ခြင်း

• ကုန်ကျစရိတ် ထိရောက်မှုရှိခြင်း

• သီးနှံပြပွဲများ၌ စနစ်တကျ သေသပ်လှပစွာ ပညာပေးပြသနိုင်ခြင်း စသည်တို့ဖြစ်ကြပါတယ်။

(က) စိုက်ပျိုးမည့်အိတ်အမျိုးအစား

• ပလပ်စတစ်အိတ်တွေလဲရှိသလို၊ ချည်သား/ဂုန်နီ/ပေါ်လီစများဖြင့် ယက်လုပ်ထားသည့်အိတ်များက အကောင်းဆုံးဖြစ်ပါတယ်။ ပလပ်စတစ်အိတ်တွေထက် လေဝင်လေထွက်ကောင်းတယ်၊ ရေမဝပ်ဘဲ ရေစီးဆင်းစေပါတယ်။

• ပလပ်စတစ်အိတ်တွေကတော့ ‌ရေထိန်းအား ပိုကောင်းပါတယ်။

• တခါတလေ ဘိလပ်မြေအိတ်၊ ဆန်အိတ်၊ ပီနံအိတ်၊ ပလပ်စတစ်ပုံးတွေနဲ့လည်း စိုက်ပျိုးလေ့ရှိကြပါတယ်။

(ခ) သီးနှံအလိုက် အသုံးပြုရမည့် အိတ်အရွယ်အစား

• အိတ်သေး (၅-၁၀ ဂါလံဆန့်)- ရွက်စားများ၊ ဆလတ်၊ ဟင်းနုနယ်၊ ကိုက်လန်၊ ပတ်ချွိုင်၊ ကန်စွန်း၊ ပင်စိမ်း၊ နံနံပင်

• အိတ်လတ် (၁၀-၁၅ ဂါလံဆန့်) - ငရုတ်၊ တိုင်လွတ်ပဲ၊ မုန်လာဥဖြူ/နီ၊ ကြက်သွန်နီ၊ ချဥ်ပေါင်၊ နဂါးမောက်

• အိတ်ကြီး (၂၀-၃၀ ဂါလံဆန့်) - ခရမ်းချဥ်၊ ခရမ်း၊ အာလူး၊ သခွား၊ သခွားမွှေး၊ ဖရဲ၊ ဖရုံ၊ တိုင်ထောင်ပဲ၊ ရုံးပတီ၊ စပျစ်

• ဥစားသီးနှံများစိုက်ပျိုးပါက ဇောက်ပိုနက်သည့် အိတ်များဖြင့် စိုက်ပျိုးရပါမယ်။

• အာလူးကဲ့သို့ အမြစ်ပျံ့နှံ့မှုကောင်းသည့် သီးနှံများအတွက် အိတ်ကျယ်ကျယ်ဖြင့် စိုက်ပျိုးရပါမယ်။

(ဂ) အိတ်မြေပြင်ဆင်ခြင်း

အလွန်အရေးကြီးပါတယ်။ စိုက်ပျိုးမြေကောင်းမှ အပင်ကျန်းမာရေး၊ အထွက်နှုန်းနဲ့ ရေထိန်းထားနိုင်မှုများ ကောင်းမွန်လာမှာဖြစ်ပါတယ်။

ကောင်းမွန်တဲ့အိတ်မြေဆိုတာ လေဝင်လေထွက်နဲ့ ရေစီးရေလာကောင်းရမယ်၊ အာဟာရလည်း ပြည့်စုံရပါမယ်။

အိတ်မြေကောင်းတစ်ခုကို ပြင်ဆင်မယ်ဆိုပါက ပါဝင်သင့်တာတွေကတော့-

• ၅၀% -မြေသားတည်ဆောက်မှုကောင်းစေတဲ့ပစ္စည်းများ (အပေါ်ယံမြေ၊ ပျိုးမြေ၊ အုန်းဆံမှုန့်၊ ရေညှိခြောက်)

• ၃၀% -အော်ဂဲနစ်ပစ္စည်းများ (မြေဆွေး၊ တီကျစ်စာ၊ ကောင်းမွန်စွာဆွေးမြည့်ထားသည့် နွားချေး၊ ကြက်ချေးများ)

• ၂၀% -လေဝင်လေထွက်နှင့် ရေစီးရေလာကောင်းစေသောပစ္စည်းများ (သဲ၊ စပါးခွံ၊ ဖွဲပြာ၊ မီးတောင်ကျောက်များ၊ ကျောက်ပွများ၊ ဇီဝမီးသွေး)

အပေါ်ယံမြေသို့မဟုတ် ပျိုးခြံစပ်မြေများကို အသုံးမပြုမီ မီးဖိုထဲ၌ (၈၂ °C)ဖြင့် မိနစ် (၃၀) ခန့် အပူပေး၍ ပိုးသတ်ပေးပါ။

သို့မဟုတ် နေရောင်ခြည်ပြင်းပြင်းအောက်၌ မြေများ ခပ်ပါးပါးဖြန့်ခင်း၍ အစိုဓာတ်နည်းနည်းရစေရန် ရေလောင်းပေးပါ၊ ထို့နောက် ပလစ်စတစ်အကြည်စ (၁-၄)မီလီမီတာအထူဖြင့် ခပ်တင်းတင်းဆွဲဖုံး၍ နေရောင်ခြည်အောက်၌ ၄-၆ ပတ်ခန့် အခြောက်လှန်းပေးပါ။

ထို့နောက် အအေးခံ၍ အခြားပစ္စည်းများဖြင့် ရောစပ်ပေးပါ။

စပ်ထားသည်မြေကို ရေအနည်းငယ်ဖျန်းပြီးမှ အိတ်ထဲထည့်ပေးပါ (လေဟာနယ်မရှိစေရန်ဖြစ်သည်)။ အပြည့်မထည့်ဘဲ အိတ်၏ ၄ ပုံ ၃ ခန့်သာ ဖြည့်ပေးပါ။

မြေမကျပ်စေရန် အထူးသတိထားရမည်ဖြစ်ပါသည်။

(ဃ) အိတ်တစ်အိတ်တွင်ထည့်ရမည့် မြေဩဇာတွက်ချက်ခြင်း

အိတ်အရွယ်အစား၊ မြေသားထုထည်နှင့် အပင်ကြီးထွားမှုအဆင့်အပေါ်မူတည်၍ မြေဩဇာကို တွက်ချက်ရပါမည်။

အပင်များ၌ ထည့်သွင်းရမည့် မြေဩဇာများကို သီးနှံအလိုက်အကြမ်းဖျင်းကြည့်မည်ဆိုပါက..

• ရွက်စားသီးနှံများ၌ နိုက်ထရိုဂျင်ပိုလိုအပ်သောကြောင့် ထည့်ရမည့် ကွန်ပေါင်းမြေဩဇာကို (၁၀-၅-၅)အချိုး သုံးပါ။

• ဥစားသီးနှံ (၅-၁၀-၅)အချိုး

• ဟင်းသီးများ (၁၀-၁၀-၁၀)အချိုး

စိုက်ပျိုးမည့် တစ်အိတ်လျှင် ဓာတ်မြေဩဇာထည့်ရမည့် ယေဘူယျနှုန်းထားများမှာ အောက်ပါအတိုင်းဖြစ်ပါသည်။ သီးနှံတစ်ရာသီစာလုံးအတွက်ဖြစ်ပြီး အကြိမ်ကြိမ်ခွဲထည့်ပေးရမည်ဖြစ်ပါသည်။

• အိတ်သေး (၅-၁၀ ဂါလံဆန့်)- စားပွဲတင်ဇွန်း ၅-၁၀ ဇွန်း

• အိတ်လတ် (၁၀-၁၅ ဂါလံဆန့်) - စားပွဲတင်ဇွန်း ၁၀-၂၀ ဇွန်း

• အိတ်ကြီး (၂၀-၃၀ ဂါလံဆန့်) - စားပွဲတင်ဇွန်း ၂၀-၄၀ ဇွန်း

• အော်ဂဲနစ်မြေဩဇာများအား တစ်လလျှင်တစ်ကြိမ် ကီလိုဝက်ခန့် ကျွေးရမည်။

• ဓာတ်မြေဩဇာများအား ၂-၃ ပတ်ခြားတစ်ကြိမ် ခွဲကျွေးရမည်။

• EM ၊ တီဆေးရည်၊ ထရိုင်ကိုဒါးမား၊ ငါးအမိုင်နိုအားဆေးကဲ့သို့ အော်ဂဲနစ်ဆေးများကို ထည့်သွင်းပေးခြင်းဖြင့် မြေဆီဩဇာကို တက်စေပါသည်။

• ရွက်ဖျန်းအားဆေးများအား အပတ်စဥ် သို့မဟုတ် ၂ ပတ်ခြားတစ်ခါ ပက်ဖျန်းပေးရမည်။

(င) စိုက်ပျိုးရန် ပြင်ဆင်ခြင်း

• မြေပေါ်တွင်စိုက်ပျိုးပါက ပေါင်းနှိမ်နင်းရသက်သာစေရန် ပလပ်စတစ်စ၊ စကာစများ၊ ပလပ်စတစ်စင်/အခင်းများ သို့မဟုတ် ဒေသထွက်ပစ္စည်းများဖြစ်သည့် ဖျာ၊ ဝါးကဒ်၊ ဝါးထရံ၊ သစ်သား၊ သစ်ရွက်ခြောက်များတို့ကို ခင်းပေးပါ။

• ထို့နောက် အိတ်များကို သက်ဆိုင်ရာသီးနှံများ၏ ပင်ကြားတန်းကြားအကွာအဝေးအလိုက် နေရာချပါ။ အပင်ငယ်စဥ်တွင် ခပ်စိပ်စိပ်ထားနိုင်သည်။

• ရေအစက်ချ၊ Sprinkler စသည်ဖြင့် ရေပေးစနစ်ပြင်ဆင်ပေးပါ။

• တစ်နေ့လျှင် နေရောင်ခြည် (၆-၈)နာရီခန့်ရသည့်နေရာများ၌ အိတ်များကို ထားရမည်။

• အလင်းမရရှိပါက ရွှေ့ပေးပါ။

• မျိုးစေ့ချပါ သို့မဟုတ် ပျိုးပင်ထည့်ပျိုးပါ။ အိတ်အရွယ်အစားအလိုက် တစ်အိတ်လျှင် ၂-၃ ပင်ခန့်အထိ စိုက်ပျိုးနိုင်ပါသည်။

(စ) ရေသွင်းခြင်း

• ရေဝပ်ခြင်း၊ ရေများခြင်းမှရှောင်ကြဥ်ရန်အတွက် ရေကိုပုံမှန်သွင်းပေးပါ။

• ရေအစက်ချစနစ်ဖြင့် ရေသွင်းခြင်းကို အထူးအကြံပြုပါသည်။

• အောက်ခံအခင်း သို့မဟုတ် ကွန်ကရစ်ခင်း အလွန်အမင်းမပူစေရန် ရေဖျန်းပေးပါ။

(ဆ) အခြားသိသင့်သည့်အချက်များ

• တွယ်တက်မည့်နွယ်သီးနှံများအတွက် တိုင်ထောင်ပေးပါ၊ ကြိုးတန်းပေးပါ။ ပိုက်ကွန်များဆင်ပေးပါ။

• ကောက်ရိုးသို့မဟုတ် သစ်ရွက်ခြောက်များဖြင့် အိတ်ကိုအုပ်ပေး၍အစိုဓာတ်ထိန်းပေးပါ။

• ခူးဆွတ်ရိတ်သိမ်းပြီးနောက် မြေသားများကိုထုတ်၍ ပိုးသတ်ခြင်း၊ မြေဆွေးများနှင့် ပြန်လည်ရောစပ်ခြင်းများကို ဆောင်ရွက်ပေးပါ။

• သီးလှည့်စနစ်ဖြင့် စိုက်ပျိုးပေးပါ။

• ပိုးမွှားရောဂါကျရောက်မှုကို အချိန်မှန်စစ်ဆေး၍၊ လိုအပ်သလို ကာကွယ်နှိမ်နင်းပေးပါ။

• ပလပ်စတစ်အိတ်ဟောင်းများကို အတွင်းအပြင်လှန်သေချာဆေးကြော၊ အခြောက်လှန်း၍ ပြန်လည်အသုံးပြုနိုင်ပါသည်။

• သီးနှံများအိတ်ဖြင့်ထည့်၍ စိုက်ပျိုးခြင်းကို GAP နှင့် အော်ဂဲနစ်စနစ်များ၌ပါ ခွင့်ပြုထားပါသည်။