ထမင်းမြိန်စေမယ့် ကြက်သား နှင့် ပဲဟင်းပါ ။ ချက်နေကျစတိုင် ဆီအများကြီး မသုံးထားပဲ၊ ဟင်းခတ်အမွှေးအကြိုင် တွေကြောင့် အနံ့ရော၊ အရသာပါ ထူးကဲ ကောင်းမွန်ပါတယ်။ ကြက်သား နှင့် ပဲဟင်းကို ထမင်း၊ ချပတီ၊ ရိုတီ တို့ဖြင့် တွဲဖက် သုံးဆောင်နိုင်ပါတယ်။ ခုပဲ ချက်နည်းလေး ကြည့်ရအောင်........
- ပါ၀င်ပစ္စည်းများ -
- ကြက်ပေါင် – ၄၅၀ ဂရမ်
(၁လက်မအရွယ် အတုံးများ တုံးထားပါ)
မှတ်ချက် ။ ။
မွေးမြူရေးကြက်သားကို အသုံးပြုလျှင် ပိုမိုကောင်းမွန်သည် ။
- ကုလားပဲ – ၁၅၀ ဂရမ် (မပြုတ်ခင် ရေနာရီ၀က် စိမ်ထားပါ။
ပြီးမှ ပဲနူးသည်အထိ ပြုတ်ပြီး ပြန်ဆယ်ထားပါ)
- ကြက်သွန်နီ – ၂ လုံး (နှုတ်နှုတ်စင်းထားပါ)
- ဂျင်းနှစ် (သို့) ဂျင်းမှုန့် – စားပွဲတင်ဇွန်း ၁ ဇွန်း
- မဆလာ – လက်ဖက်ရည်ဇွန်း ၁ ဇွန်း
- ဖာလာစေ့ – ၂ ခု
- လေညှင်း – ၄ ပွင့်
- ငရုတ်သီးမှုန့် – စားပွဲတင်ဇွန်း ၁ ဇွန်း
- ဆနွင်းမှုန့် – လက်ဖက်ရည်ဇွန်း တ၀က်
- နံနံစေ့မှုန့် – စားပွဲတင်ဇွန်း ၁ ဇွန်း
- ဆား – လက်ဖက်ရည်ဇွန်း ၁ ဇွန်းခွဲ
- ကြက်သားမှုန့် – လက်ဖက်ရည်ဇွန်း ၁ ဇွန်း
- နံနံပင် – လက်တဆုပ်စာ (ပါးပါးလှီးထားပါ)
- ဆီ – စားပွဲတင်ဇွန်း ၁ ဇွန်းခွဲ
- ချက်ပြုတ်နည်း -
၁။ အရင်ဆုံး ဒယ်(သို့) Pressure cooker ထဲ ဆီထည့်ပြီး ဆီပူလျှင် ကြက်သွန်နီ ဆီသပ်ပေးပါ ။
၂။ ထို့နောက် မဆလာ၊ ဖာလာစေ့၊ လေညှင်း တို့ကို ထည့်မွှေပေးပါ။
၃။ ပြီးမှ ဂျင်းနှင့် ဆနွင်း ထည့်ကာ ဆီသပ်ပါ ။
၄။ ကြက်သား၊ ငရုတ်သီးမှုန့်၊ နံနံစေ့မှုန့်၊ ဆား၊ ကြက်သားမှုန့်တို့ကို ထည့်ပြီး ၁ မိနစ်ခန့် ရောမွှေပေးပါ ။
၅။ ကြက်သား ရေမြုပ်ရုံ ရေ(၄ခွက်) ထည့်ကာ အဖုံးအုပ်ပြီးကြက်သား ကျက်သည်အထိ ဒယ်အိုး (သို့) Pressure cooker ကို အဖုံးအုပ်ကာ ၁၅ မိနစ်ခန့် မီးအတင့်တင့်ဖြင့် တည်ထားပါ ။
၆။ ကြက်သားကျက်ပြီးဆိုလျှင် (ပြုတ်ထားသော ပဲ) ကို ကြက်သားဖြင့် ရောကာ နောက်ထပ် ၁၀ မိနစ် ထပ်တည်ပေးပါ ။
ရ။ အရသာ အနေတော်လျှင် နောက်ဆုံးမှ မဆလာ (လက်ဖက်ရည်ဇွန်း တ၀က်)၊ နံနံပင် အုပ်လိုက်ပါ ။
ဒါဆို အရသာရှိပြီး ထမင်းမြိန်စေမယ့် ကြက်သား နှင့် ပဲကုလားဟင်းကို သုံးဆောင်နိုင်ပါပြီး........
No comments:
Post a Comment