အိမ်မှာတင် အလွယ်တကူ လုပ်စားလို့ရမယ့် ရှယ်မာလာမှုန့် ပြုလုပ်နည်းလူ ၁၀၀မှာ ၉၉ယောက်လောက်ကြိုက်ကြတဲ့… မာလာရှမ်းကောတို့၊ မာလာဒုတ်ထိုးတို့၊ မာလာဟင်းတို့ စားတဲ့အခါ အဓိက အသက်က "မာလာမှုန့်" ပဲမလား?
ဒီနေ့တော့ ဆိုင်ကဝယ်စားစရာမလိုဘဲ အနံ့ရော အရသာပါ ရှယ်မွှေးပြီး စားလို့ကောင်းမယ့် "အိမ်လုပ် မာလာမှုန့်" လုပ်နည်းလေးကို မျှဝေပေးလိုက်ပါတယ်ရှင်။ကဲ... ပါဝင်ပစ္စည်းလေးတွေနဲ့ လုပ်နည်းကို ကြည့်လိုက်ရအောင်နော်
ပါဝင်ပစ္စည်းများငါးမျိုးစပ် ပေါင်ဒါမှုန့် (Five Spices Powder) - ၁ ထုပ်
(သစ်ဂျပိုးခေါက်၊ နာနတ်ပွင့်၊ လေးညှင်းပွင့်၊ ဇီယာစေ့၊ စမုန်စပါး ကြိတ်ထားသော အမှုန့်)
အထုံစေ့ (Sichuan Pepper) - ၁ ထုပ်
နှမ်း - ၁ ထုပ် (ထောင်းရန်အတွက် တစ်ဝက်ချန်ထားပါ)
ငရုတ်သီး အလှော်မှုန့် - ၂ ဇွန်း
ငရုတ်သီး ပေါင်ဒါမှုန့် (သို့) အရောင်တင်မှုန့် - ၁ ထုပ်
ဆား - မိမိစိတ်ကြိုက် (အချိုးအစားအလိုက်)
ကြက်သားမှုန့် (သို့) အချိုမှုန့် - မိမိစိတ်ကြိုက်
သကြား - နည်းနည်း (တရုတ်အရသာ စစ်စစ် ကြိုက်နှစ်သက်သူများအတွက်)
ပြုလုပ်နည်း အဆင့်ဆင့်အဆင့် (၁) - ပါဝင်ပစ္စည်းများ လှော်ခြင်း
၁။ အရင်ဆုံး နှမ်းတွေကို အိုးထဲထည့်ပြီး မီးအေးအေးနဲ့ ဖြည်းဖြည်းချင်း မွှေးလာပြီး အရောင်ပြောင်းတဲ့အထိ လှော်ပေးပါ။
၂။ ပြီးရင် အထုံစေ့ကိုလည်း အိုးထဲထည့်ပြီး လှော်ပေးပါ။ (
အရမ်းမွှန်ပြီး အနံ့ပြင်းလို့ လှော်တဲ့အချိန် Mask တပ်ထားဖို့ မမေ့နဲ့နော်!)၃။ နောက်ဆုံးမှာတော့ ဝယ်ထားတဲ့ ငါးမျိုးစပ် ပေါင်ဒါအမှုန့်လေးကိုလည်း မီးအေးအေးလေးနဲ့ မွှေးသွားအောင် ခဏလှော်ပေးရပါမယ်။
အဆင့် (၂) - ထောင်းခြင်းနှင့် ရောစပ်ခြင်း
၄။ လှော်ထားတဲ့ အထုံစေ့ကို ညက်သွားအောင် အရင်ဆုံး ထောင်းပေးပါ (ကြိတ်စက်ရှိရင် ကြိတ်စက်နဲ့ ကြိတ်လို့ရပါတယ်ရှင်)။
၅။ အထုံစေ့ ညက်ပြီဆိုရင် ခုနကလှော်ထားတဲ့ နှမ်းတစ်ဝက်ကို ထည့်ပြီး "မညက်တညက်လေး" ထပ်ထောင်းပေးပါ။
၆။ ပြီးရင်တော့ ဇလုံတစ်ခုထဲမှာ ထောင်းထားတဲ့ အထုံစေ့နဲ့ နှမ်း၊ လှော်ထားတဲ့ ငါးမျိုးစပ် ပေါင်ဒါမှုန့်၊ ငရုတ်သီးအလှော်မှုန့် (၂ ဇွန်း) နဲ့ ငရုတ်သီးပေါင်ဒါမှုန့် (သို့) အရောင်တင်မှုန့်တို့ကို ထည့်ပြီး သမအောင် ရောမွှေလိုက်ပါ။
အဆင့် (၃) - အရသာသွင်းခြင်း
၇။ အကုန်လုံး သမသွားပြီဆိုရင် အရသာအတွက် ဆား၊ ကြက်သားမှုန့် (သို့) အချိုမှုန့် ထည့်ပါ။ တရုတ်အရသာစစ်စစ်လေး ကြိုက်ရင် သကြားနည်းနည်း ထည့်နိုင်ပြီး၊ မြန်မာတွေအကြိုက်ဆိုရင်တော့ သကြားမထည့်ဘဲ စားနိုင်ပါတယ်ရှင်။
၈။ မိမိစိတ်ကြိုက် အရသာ အပေါ့အငန် မြည်းပြီး လိုအပ်တာ ထပ်ဖြည့်လိုက်ရင်တော့ ရှယ်ကျကျ ကွက်တိ မာလာမှုန့်လေး ရပါပြီနော်။
ပုလင်းလေးထဲ ထည့်သိမ်းထားပြီး မာလာဟင်းပဲလုပ်စားစား၊ မာလာမုန့်ပဲ လုပ်စားစား အဆင်ပြေပြီပေါ့။ အားလုံးပဲ အဆင်ပြေကြပါစေရှင်~
No comments:
Post a Comment