အလုပ်အတူ လုပ်ဖို့ အတူအောင်မြင်ဖို့ မခေါ်ရက်ဘူး . . .
သူငယ်ချင်း ငါ့ကို တွဲခေါ်ပါအုံး မင်းလိုမျိုး လုပ်ချင်တယ် ဆိုတော့ သူငယ်ချင်း ငါမခေါ်ရက်ပါဘူးကွာ . . . ဆိုတော့ ဘာလို့လဲဟ တဲ့ . . .
မနက် မိုးလင်းက မိုးချုပ် အလုပ် အလုပ်ဆိုတာပဲ လုပ်နေရတာလေ . . . ဒီနေ့အတွက် ပြီးသွားတော့ မနက်ဖြန်အတွက်ဆိုပြီး ချရပြန်ရော . . . ဟောဒါနဲ့ မပြီးသေး နောက်လအတွက် နောက်နှစ်အတွက်တွေ ကြိုတင်ပြင်ဆင်ရပြန်ရော . . .
ဒါတင်ပဲလားဆိုတော့ မဟုတ်သေးဘူး အပြိုင်တိုးတက်နေတဲ့ ခေတ်ကြီးမှာ ငါသိထားခဲ့တဲ့ အသိတွေက အနုတ်ဘက်ပြလာတယ် ပြောချင်တာက ရှေ့ဆက်ရမည့် လုပ်ငန်းတွေက ငါသိထားခဲ့တဲ့ အသိပညာနဲ့တင်မရတော့ဘူး . . . ဒီတော့ ညပိုင်းအားချိန်လေးတွေမှာဆိုလည်း ဟော လေ့လာနေရပြန်ရော . . .
အဲ့ဒါတွေကလည်း တစ်ရက်ထဲမဟုတ်ဘူးနော် နေ့စဉ်ပဲ သူငယ်ချင်း . . . ငယ်ငယ်က ကျောင်းမသွားချင်ရင် ခွင့်တိုင်လို့ရခဲ့ပေမယ့် အခုက ဘဝကျောင်းတော်ကြီးဖြစ်လို့ ခွင့်မရဘူးလေ . . . တစ်ခါတစ်လေ ညညတွေမှာ မိုးလင်းတဲ့အခါလင်းပေါ့ကွာ . . . ညနက်မှ အိပ်ချင်လည်း အိပ်ရနဲ့ . . . အလုပ်တိုးတက်ပြီး အလုပ်များလာတာနဲ့အညီ စိတ်ပူပင်မှုတွေက အိပ်မပျော်စေခဲ့ဘူးလေ . . .
မိသားစုနဲ့လား တစ်ခါတစ်လေ ဘယ်သွားမယ် ညာသွားမယ်ဆိုပြီး အပန်းဖြေသွားဖို့ အစီအစဉ်တွေ ချထားခဲ့ပေမယ့်လည်း အလုပ်က လိုအပ်လာရင် အစီအစဉ်တွေဖျက်ပြီး အလုပ်ပဲ ဆက်လုပ်ရတာလေ . . .
ငါပြောခဲ့ဘူးသားပဲ . . . အရာရာမှာ လိုအပ်ချက်တွေများနေခဲ့တဲ့ ငါတို့အတွက် အချိန်ဆိုတာ ရွှေတွေပဲလေ . . .
အပန်းဖြေမှုလား အရာရာမှာ ကိုယ်ကပဲ ဦးဆောင်ဦးရွက်ပြုနေရတဲ့ ဘဝမှာ Bar ပဲသွားထိုင်ထိုင် Night out ပဲ ထွက်ထွက် အပျော် Party တွေပဲ သွားသွား ဦးနှောက်မှာ ပြနေတာက တစ်ခုထဲပဲ အလုပ်တွေမပြီးပြတ်သေးဘူးနော် . . .
ဆိုတဲ့ အရာကပဲ နေရာယူထားခဲ့တယ်လေ . . . ဘယ်လိုဖျော်ဖြေမှုမျိုးက တကယ်ရင်ဆိုင်နေရတဲ့ ပြဿနာကို ဖြေရှင်းနိုငိမှာမို့လို့လဲ . . . တကယ်တော့ ငါတို့အတွက် တကယ့်ပျော်ရွှင်မှု အစစ်က အလုပ်ပြီးမြောက်ခြင်းပဲ သူငယ်ချင်း . . . အမြဲလိုလို စိတ်ညစ်တိုင်း အရက်
သောက်တက်တဲ့ Night Out တွေ ထွက်တက်တဲ့ မင်းအတွက် ငါအားနာမိလို့ပါ . . .
ဒါတွေပြောမိမှ သတိရမိတယ် လုပ်ငန်းရှင် သူဌေးကြီးတစ်ယောက်ပဲ အလုပ်ချိန် အလုပ်တွေလုပ် ညအချိန်ဆို ဘားတွေသွား ကလပ်တွေတက်နဲ့ သူ့ဘဝကြီးကို အားကျမိခဲ့တယ် . . .
လူဆိုတာ အဲ့လိုမျိုးမှဆိုပြီးတော့ပေါ့ကွာ . . . ဒါပေမယ့် အထင်နဲ့ အမြင်လွဲခဲ့တယ် . . . လုပ်ငန်းတွေအဆင်ပြေနေချိန်မှာ ငွေတွေ နေ့စဉ်ဝင်နေချိန်မှာ ဘာလုပ်လုပ်ပျော်စရာကောင်းနေခဲ့ပေမယ့် ဟော မကြာဘူး အလုပ်မှာ ပြဿနာတွေတက် အလုပ်တွေက ပျက်နဲ့ ဖြစ်လာတော့ အရမ်းပျော်တက်တဲ့ သူတောင် ဘားတွေ ကလပ်တွေ မသွားဖြစ်တော့ဘူးတဲ့လေ . . . ဘာလို့လဲ လို့မေးကြည့်တော့ အလုပ်တွေအဆင်မပြေပါဘူးဗျာတဲ့ . . . ဘယ်လိုပျော်မလဲ ဘာသောက်သောက် စိတ်ပဲ ညစ်နေရတယ်ဗျာတဲ့လေ . . .
ဒါကလည်း မင်းပြောပြောနေတဲ့ စိတ်ကို အလွတ်ပျော်ကြည့်စမ်းပါ သူငယ်ချင်းရာလ်ု့ ပြောပြောနေလို့ ငါပြောပြတာပါ . . . အလုပ်တစ်ခုကို ဦးဆောင်နေရတဲ့ သူတွေအတွက်က သူ့အတွက်တစ်ခုထဲစဉ်းစားနေရတာ မဟုတ်ပဲ အဖွဲ့အစည်းတစ်ခုလုံးကြီးကို ခေါင်းထဲထည့်စဉ်းစားပြီးအလုပ်တွေလုပ်ရတာ သူငယ်ချင်း . . .
ခေါင်းဆောင်တစ်ယောက်အတွက် ပြဿနာ လှိုင်းလုံးကြီးတွေကို တစ်လုံးပြီး တစ်လုံး ကျော်နိုင်ဖို့ပဲ ကြိုတင်ပြင်ဆင်မှုတွေနဲ့ 24/7 အရန်သင့်အနေအထားနဲ့ နေနေရတာလေ . . . မကျော်နိုင်လို့ မြုပ်သွားခဲ့ရင် ဘယ်သူမှ လာကယ်မှာ မဟုတ်ဘူးလေ . . . လူတိုင်းက ကိုယ့်ရဲ့ ပြဿနာတွေကိုယ် ဖြေရှင်းနေကြရတာနဲ့တင် မအားကြဘူးလေ . . .
လုပ်ငန်းတစ်ခုကို ဦးဆောင်နိုင်ဖို့ အောင်မြင်စွာ ပန်းတိုင်တွေကို ရောက်ရှိဖို့က ခေါင်းဆောင်တစ်ယောက်ရဲ့တာဝန်တွေပဲလေ . . . မင်းမြင်နေတဲ့ ငါ့ကိုပဲ အားမကျနဲ့ သူငယ်ချင်း . . .
အဲ့လောက်အထိ ခက်ခဲစေလို့ အလုပ်အတူ လုပ်ဖို့ တွဲမခေါ်ရက်ပါဘူး . . . မင်းလုပ်လက်စ အလုပ်ကိုပဲ ဆက်လုပ်ပါကွာ . . .
အဲ့အခက်အခဲတွေကို ကျော်ဖြတ်နိုင်ရမယ်ဆိုတဲ့ တုံးတိုက်တိုက် ကျားကိုက်ကိုက် ဆိုတဲ့ ရဲရင့်ပြတ်သားတဲ့ စိတ်ရှိတဲ့ တစ်နေ့မှ ငါ့ဆီလာခဲ့ပါ . . .
No comments:
Post a Comment